तस्य तद्वचनं श्रुत्वा वालिसूनुरभाषत
अयुक्तं तु विना देवीं दृष्टवद्भिश्च वानराः
समीपं गन्तुमस्माभी राघवस्य महात्मनः
दृष्टा देवी न चानीता इति तत्र निवेदनम्
अयुक्तमिव पश्यामि भवद्भिः ख्यातविक्रमैः
न हि नः प्लवने कश्चिन्नापि कश्चित्पराक्रमे
तुल्यः सामरदैत्येषु लोकेषु हरिसत्तमाः
तेष्वेवं हतवीरेषु राक्षसेषु हनूमता
किमन्यदत्र कर्तव्यं गृहीत्वा याम जानकीम्
तमेवं कृतसङ्कल्पं जाम्बवान् हरिसत्तमः
उवाच परमप्रीतो वाक्यमर्थवदर्थवित्
न तावदेषा मतिरक्षमा नो यथा भवान् पश्यति राजपुत्र
यथा तु रामस्य मतिर्निविष्टा तथा भवान् पश्यतु कार्यसिद्धम्