तस्यामात्या गुणैरासन्निक्ष्वाकोस्तु महात्मनः
मन्त्रज्ञाश्चेङ्गितज्ञाश्च नित्यं प्रियहिते रताः
अष्टौ बभूवुर्वीरस्य तस्यामात्या यशस्विनः
शुचयश्चानुरक्ताश्च राजकृत्येषु नित्यशः
धृष्टिर्जयन्तो विजयः सिद्धार्थोह्यर्थसाधकः
अशोको मन्त्रपालश्च सुमन्त्रश्चाष्टमोऽभवत्
ऋत्विजौ द्वावभिमतौ तस्यास्तामृषिसत्तमौ
वसिष्ठो वामदेवश्च मन्त्रिणश्च तथाऽपरे
मार्कण्डेयस्तु दीर्घायुस्तथा कात्यायनो द्विजः
एतैर्ब्रह्मर्षिभिर्नित्यमृत्विजस्तस्य पौर्वकाः
विद्याविनीता ह्रीमन्तः कुशला नियतेन्द्रियाः
श्रीमन्तश्च महात्मानः शास्त्रज्ञा दृढविक्रमाः
तेजःक्षमायशःप्राप्ताः स्मितपूर्वाभिभाषिणः
क्रोधात्कामार्थहेतोर्वा न ब्रूयुरनृतं वचः
तेषामविदितं किञ्चित् स्वेषु नास्ति परेषु वा
क्रियमाणं कृतं वापि चारेणापि चिकीर्षितम्
कुशला व्यवहारेषु सौहृदेषु परीक्षिताः
प्राप्तकालं तु ते दण्डं धारयेयुः सुतेष्वपि
कोशसङ्ग्रहणे युक्ता बलस्य च परिग्रहे
अहितं वापि पुरुषं न विहिंस्युरदूषकम्
वीराश्च नियतोत्साहा राजशास्त्रमनुष्ठिताः
शुचीनां रक्षितारश्च नित्यं विषयवासिनाम्
ब्रह्मक्षत्रमहिंसन्तस्ते कोशं समपूरयन्
सुतीक्ष्णदण्डाः सम्प्रेक्ष्य पुरुषस्य बलाबलम्
शुचीनामेकबुद्धीनां सर्वेषां सम्प्रजानताम्
नासीत्पुरे वा राष्ट्रे वा मृषावादी नरः क्वचित्
कश्चिन्न दुष्टस्तत्रासीत् परदाररतो नरः
प्रशान्तं सर्वमेवासीद्राष्ट्रं पुरवरं च तत्
सुवाससः सुवेषाश्च ते च सर्वे सुशीलिनः
हितार्थं च नरेन्द्रस्य जाग्रतो नयचक्षुषा
गुरौ गुणगृहीताश्च प्रख्याताश्च पराक्रमे
विदेशेष्वपि विज्ञाताः सर्वतो बुद्धिनिश्चयात्
सन्धिविग्रहतत्त्वज्ञाः प्रकृत्या सम्पदान्विताः
मन्त्रसंवरणे शक्ताः श्लक्ष्णास्सूक्ष्मासु बुद्धिषु
नीतिशास्त्रविशेषज्ञाः सततं प्रियवादिनः
ईदृशैस्तैरमात्यैश्च राजा दशरथोऽनघः
उपपन्नो गुणोपेतैरन्वशासद्वसुन्धराम्
अवेक्षमाणश्चारेण प्रजा धर्मेण रञ्जयन्
प्रजानां पालनं कुर्वन्नधर्मं परिवर्जयन्
विश्रुतस्त्रिषु लोकेषु वदान्यः सत्यसङ्गरः
स तत्र पुरुषव्याघ्रः शशास पृथिवीमिमाम्
मित्रवान्नतसामन्तः प्रतापहतकण्टकः
स शशास जगद्राजा दिवं देवपतिर्यथा
तैर्मन्त्रिभिर्मन्त्रहिते नियुक्तैर्वृतोऽनुरक्तैः कुशलैः समर्थैः
स पार्थिवो दीप्तिमवाप युक्तस्तेजोमयैर्गोभिरिवोदितोऽर्कः